Zanzibar
RAIS wa Zanzibar na Mwenyekiti wa Baraza la Mapinduzi Dk.Hussein Ali Mwinyi amesema Serikali imevuka malengo ilani ya CCM ya mwaka 2020-2025 , ambapo ilani ilisema kupima maeneo ya viwanda na kuyaweka tayari Serikali imetekeleza kwa kupima maeneo hayo, kutayarisha miundombinu ikiwemo ya barabara na miradi ya ujenzi wa viwanda tayari imeshainiwa.
Dk.Mwinyi ameyasema hayo alipoweka jiwe la msingi katika mradi wa ujenzi wa eneo maalum liliotengwa na Serikali kwa ajili ya viwanda, Dunga Mkoa wa Kusini Unguja Agosti, 7 2024.
Aidha Rais Dk.Mwinyi amesema tayari viwanda viwili vya dawa vimeshatiwa saini leo na vingine vya magari vinakuja katika maeneo ya Dunga.
Vilevile ameeleza kuwa akimaliza awamu ya uongozi mwaka 2025, Serikali itakuwa imeacha alama kwa kukamilisha ujenzi wa viwanda Unguja na Pemba.
Kwa upande mwingine Rais Dk.Mwinyi amesema Serikali ina dhamira ya kuhakikisha maeneo yaliyotengwa kwa viwanda yanawekewa miundombinu muhimu ikiwemo barabara,umeme, maji, na tehama ili kuvutia wawekezaji wa viwanda wa ndani na nje ya Zanzibar.
Rais Dk.Mwinyi amesema mradi wa viwanda una faida mbalimbali ikiwemo fursa za ajira kwa vijana, kuongeza thamani kwa mazao ya wakulima na wafugaji pamoja na mapato ya Serikali kupitia kodi mbalimbali.
