Dar es Salaam
WAZIRI Mkuu, Kassim Majaliwa leo Desemba 19, 2024 amemwakilisha Rais Dk. Samia Suluhu Hassan kwenye kuaga mwili wa marehemu John Billy Tendwa ambaye aliwahi kuwa Msajili wa Vyama vya Siasa nchini.
Akitoa Salama pole kwa waombolezaji wakati wa tukio la kuaga lililofanyika katika Viwanja vya Karimjee Jijini Dar es Salaam, Majaliwa amesema kuwa Rais Dk. Samia ametoa wito kwa wanafamilia, ndugu na waombolezaji kuyaenzi mema yote aliyoyafanya marehemu Tendwa katika kipindi cha uhai wake.
Amesema kuwa Marehemu Tendwa alikuwa mtumishi wa umma ambaye mara zote alitekeleza majukumu yake kwa weledi, ujasiri na uadilifu mkubwa katika kipindi ambacho vyama vya siasa vilikuwa vinajijenga.
“Tunaungana na wanafamilia katika kuomboleza msiba huu, sote tuna jukumu la kuombea na kuenzi kwa kuyaendeleza mazuri yote aliyoyafanya katika nchi hii,”amesema.
Naye, Rais Mstaafu wa Awamu ya Nne, Dk. Jakaya Mrisho Kikwete amesema kuwa Marehemu Tendwa alikuwa na sifa ya ukweli kwa vyama vyote vya siasa, ujasiri na kutokuwa na upendeleo.
“Kwa Kiasi kikubwa amesaidia kujenga demokrasia ya vyama vingi nchini na huwezi kuzungumza kuhusu ustawi wa vyama vya siasa nchini bila kumtaja Marehemu Tendwa,”amesema.
Akieleza namna alivyopata taarifa za ugonjwa hadi mauti ya Tendwa, Rais Kikwete amesema alipigia simu na mtoto wa marehemu.
“Sikuwa nafahamu kama anaumwa, mwanae alinipigia simu akaniambia, akasema baba anakutaja sana, nikamuuliza hali yake akasema si nzuri, yupo ICU, nilikuwa nje ya nchi nikapanga, Jumamosi nikamuone, lakini ndipo likatokea hili,” amesema.
Kwa Upande wake, Msajili wa Vyama vya Siasa Jaji Francis Mutungi amesema kuwa kifo cha Marehemu Tendwa si pigo kwa familia tu bali kwa wale wote wanaotambua thamani ya mchango wake katika siasa ya demokrasia ya vyama vingi nchini.
Amesema kuwa Marehemu Tendwa alikuwa ni kiongozi mwenye maono na uadilifu wa hali ya juu, aliyediriki kujitolea kwa dhati kuhakikisha misingi ya demokrasia ya vyama vingi inajengwa kwa haki na uwazi “Uongozi wake uliweka alama kubwa katika historia ya demokrasia ya siasa ya vyama vingi hapa nchini”.
“Ndiye alinikabidhi ofisi hii nilipo (msajili wa vyama vya siasa) alikuwa mwalimu na mshauri wangu, katika utendaji wake alisimamia misingi ya demokrasia kwenye vyama vya siasa,” amesema.
Kadhalika, Mwenyekiti wa Baraza la Vyama vya Siasa Mheshimiwa Juma Ally Khatibu amesema kuwa marehemu John Billy Tendwa alikuwa nguzo ya mazungumzo ya kitaifa na mshikamano wa kisiasa kwani aliongoza kwa hekima na kujenga mazingira ya siasa yenye heshima, usawa, na mshikamano baina ya vyama vya siasa.
“Katika nafasi yake kama Msajili wa Vyama vya Siasa, marehemu alitoa mchango mkubwa katika kuimarisha misingi ya demokrasia ya vyama vingi. Alisimamia taratibu za vyama kwa haki na bila upendeleo, akijenga imani kati ya wadau wa siasa na wananchi,”amesema
Marehemu Mzee Tendwa alihudumu katika nafasi ya Msajili wa Vyama vya Siasa kwa kipindi cha miaka 12 kutoka Mwezi Mei 2001 hadi Agosti 2013. Marehemu Mzee Tendwa alifariki Desemba 17, 2024 katika Hospitali ya Taifa ya Muhimbili alipokuwa akipatiwa matibabu.
Baadhi ya viongozi walioshiki kuaga mwili wa Marehemu Mzee Tendwa ni Rais Mstaafu wa Awamu ya Nne, Dk. Jakaya Mrisho Kikwete, Naibu Waziri Ofisi ya Waziri Mkuu (Sera, Bunge na Uratibu) Ummy Nderianaga, Mkuu wa Mkoa wa Dar es Salaam, Albert Chalamila Msajili wa Vyama vya Siasa, Jaji Francis Mutungi na Katibu Mkuu Ofisi ya Waziri Mkuu (Sera, Bunge na Uratibu) Dk. Jim Yonaz.
