Dar es Salaam
WALAJI Foundation for Civil Society (FCS) na Baraza la Ushauri la Watumiaji wa Huduma za Usafiri Ardhini (LATRA CCC) wamesainiana Mkataba wa Makubaliano (MoU) wa miaka mitatu ili kuimarisha ulinzi wa walaji na haki zao katika Sekta ya Usafiri ardhini.
Akizungumza na waandishi wa habari katika hafla ya kusainiana makubaliano hayo Oktoba 22, 2024 jijini Dar es Salaam, Mkurugenzi Mtendaji wa FCS Justice Rutenge amesema ubia huo unaenda na misingi yao FCS, ambapo miezi kadhaa walisaini makubalino na Baraza la Ushauri la watumiaji wa huduma za mawasiliano TCRA na Leo LATRA CCC na bado wanaongeza mkataba Baraza lingine moja.
Pia amebainisha kuwa makubaliano hayo yanalenga kuhakikisha wasafiri na wasafirishaji kwa njia ya ardhini wanapata huduma bora zenye kukidhi matakwa ya kitaifa na kimataifa.
” Kwa kuungana kwetu FCS na LATRA CCC tunakusudia kuunda mazingira bora ya walaji katika sekta ya usafiri wa ardhi, kukuza taratibu bora za kibiashara na kuhamasisha ukuaji wa biashara,” amesema Rutenge.
Amesema Ushirikiano huo wa kimkakati utahusisha kubuni na kutekeleza mipango inayokuza haki za walaji na kulinda bidhaa na huduma za usafiri wa ardhi zinazodhibitiwa ikiwemo barabara, reli, majini,
“Kwa miongo miwili iliyopita, FCS imeweka mtazamo wa kuzingatia raia, ikilenga kukuza uwezo wa raia. Ahadi yetu ya kulinda walaji inatokana na dhana hii,”ameongeza.
Mkurugenzi Rutenge amefafanua kuhusu haki muhimu ambazo walaji wanazo, ikiwa ni pamoja na haki ya kupata malipo ya haki kwa madai, elimu kuhusu usafiri wa ardhini, wa bidhaa na huduma, na uhakikisho wa ubora.
“Katika kushirikiana na LATRA CCC, wadau muhimu katika kukuza ulinzi wa walaji katika sekta ya usafiri wa ardhi, FCS itatumia utaalamu wake katika kujenga uwezo kusaidia LATRA CCC katika kutafuta rasilimali muhimu za kutekeleza mipango inayolenga kulinda haki za walaji nchini Tanzania,” ameeleza.
Kwa upande wake Katibu Mtendaji wa LATRA CCC, Daud Daudi, amebainisha umuhimu wa kuzingatia changamoto pana ambazo walaji wanakabiliana nazo katika kupata bidhaa na huduma za usafiri zilizo na udhibiti.
Aidha amesema kwamba ulinzi mzuri wa walaji katika sekta ya usafiri ni wa muhimu na amesisitiza umuhimu wa ushirikiano kati ya wadau wa maendeleo, akisema kuwa ushirikiano huu utaimarisha mifumo ya ulinzi wa walaji na kuhakikisha kuna hatua madhubuti za kulinda walaji.
“Kadri Tanzania inavyosonga mbele kuelekea kukuza mazingira yanayosaidia juhudi za pamoja za kukuza taratibu za biashara zinazofaa na kuwapa walaji maarifa, FCS na LATRA CCC wanatarajia kutekeleza mpango mpana wa ulinzi na haki za walaji katika sekta ya usafiri nchini Tanzania, wakikuza uwezo wa walaji, kutetea haki zao na kuimarisha ushirikiano na wadau muhimu,” amesema.
Ulinzi wa walaji unabaki kuwa kipaumbele cha kimkakati kwa FCS, kama inavyoonyesha makubaliano yao ya hivi karibuni ya ufadhili wa miaka mitatu na Trademark.
Ushirikiano na LATRA CCC unalenga kufikia malengo haya, kwa kuhusisha jamii na baraza la udhibiti kupitia ushirikiano na wadau muhimu na kuanzisha kamati za walaji maalum kwa ajili ya maeneo na sekta.
