Asema alikuwa alikuwa ni moja ya majaji wa mahakama ya rufani wenye uwezo mkubwa
Dodoma
WAZIRI Mkuu, Kassim Majaliwa leo Desemba 30, 2024 amemwakilisha Rais Dk. Samia Suluhu Hassan kwenye mazishi ya Mwanaisha Kwariko ambaye alikuwa Jaji wa Mahakama ya Rufani na Mjumbe wa Tume Huru ya Taifa ya Uchaguzi.
Akitoa Salama pole kwa waombolezaji nyumbani kwa marehemu Kondoa, Mkoani Dodoma, Majaliwa amesema kuwa Rais Dk. Samia ameguswa na kifo cha Mheshimiwa Mwanaisha kwani alikuwa ni moja ya majaji wa mahakama ya rufani wenye uwezo mkubwa katika nafasi zote alizozitumikia.
Majaliwa amesema kuwa Marehemu Mheshimiwa Mwanaisha alikuwa kiongozi aliyetekeleza wajibu wake kwa weledi na uadilifu.
“Msiba huu kwetu ni mzito, jukumu letu Wanakondoa, Watanzania, Majaji na wajumbe wa Tume ni kuendelea kumuombea kwa Mwenyezi Mungu,”amesema.
Aidha, Majaliwa ametoa wito kwa kila mmoja kuenzi yote mazuri aliyoyafanya Mheshimiwa Mwanaisha katika kipindi chake chote cha utumishi wa umma kwani kufanya hivyo kutakuwa ni njia nzuri ya kuweka kumbukumbu ya kazi zake.
Kwa upande wake, Jaji Mkuu wa Tanzania Profesa Ibrahimu Juma amesema kuwa Mwanaisha Kwariko aliishi kiapo cha Uhakimu kwa kutoa huduma kwa wananchi ikiwemo kutatua migogoro kwa uadilifu bila upendeo wowote,
“Mwanaisha alikuwa na ubinadamu na utu, maisha yake yalikuwa ni yakusaidia watu wengine, sisi tunamshukuru Mwenyezi Mungu kwani uhai wake umetusaidia sana katika shughuli mbalimbali za kimahakama,”amesema.
Kwa upande wake Mwenyekiti wa Tume Huru ya Taifa ya Uchaguzi Jaji (Rufani) Jacobs Mwambegele amesema kuwa Mheshimiwa Mwanaisha ameondoka katika kipindi ambacho tume ilikuwa inamuhitaji hasa katika kipindi hiki ambacho tume hiyo ipo katika mchakato wa kuboresha daftari la kudumu la wapiga kura kuelekea uchaguzi mkuu wa Rais, Wabunge na Madiwani.
“Tumempoteza Mheshimwa Mwanaisha tukiwa kwenye mzunguko wa nane wa zoezi la kuboresha daftari na tukiwa tunaingia kwenye mzunguko wa tisa utakaohusiaha mikoa minne Rukwa, Songwe, Njombe na Ruvuma, pia mara zote alitoa ushauri wenye weledi wa hali ya juu katika kuhakikisha tume inatekekeza majukumu yake kwa kuzingatia katiba sheria kanuni na taratibu,”amesema.
Naye, Mkuu wa Mkoa wa Dodoma Rosemary Senyamule amesema kuwa Mwanaisha alikuwa ni kiongozi mwenye msimamo na mtetezi wa masuala ya wanawake, “alibobea katika eneo ambalo alikuwa anafanyia kazi, sisi wanadodoma tutamkumbuka kwa machango wake mkubwa kwenye masuala ya maendeleo”
Marehemu Jaji wa Mahakama ya Rufani Mwanaisha Kwariko alifariki Desemba 27, 2024 nchini India alipokuwa akipatiwa matibabu.
