📌Shilingi bilioni 2 zimetolewa na REA kuendeleza mradi
📌 Utunzaji wa mazingira umepewa kipaumbele kwenye utekelezaji wa miradi
Makete – Njombe
RAIS Dk. Samia Suluhu Hassan ameipa kipaumbele sekta binafsi kutekeleza miradi ya nishati ya umeme kwa kuwekeza katika sekta hiyo na kuwezesha fedha ili wananchi waendelee kupata umeme wa uhakika nchini.
Hayo yamebainishwa na Mkurugenzi wa Nishati Jadidifu na Teknolojia Mbadala, Mhandisi Advera Mwijage alipotembelea mradi wa umeme wa Ijangala (Ijangala Mini Hydropower Plant 360 kW) uliopo katika wilaya ya Makete mkoani Njombe.
Amesema kuwa Rais Dk.Samia amefanikisha upatikanaji wa umeme wa uhakika na muda wote katika maeneo yenye miradi hiyo.
“Tunatoa shukrani kwa Rais Samia kwa kutambua mchango wa sekta binafsi katika kushirikiana na Serikali kuendeleza vyanzo vya umeme na kuhakikisha wananchi wanapata huduma,” amesema Mhandisi Mwijage.
Vile vile ameishukuru Wizara ya Nishati na Bodi ya Nishati Vijijini kwa miongozo na maelekezo mbalimbali ya kuhakikisha REA inatekeleza majukumu yake ipasavyo katika kuwahudumia wananchi.
Pia amesema kuwa, utunzaji wa mazingira katika miradi hiyo umepewa kipaumbele kwa kuwa inazalisha umeme kwa kutumia nishati jadidifu.
“Tunapata fedha kupitia mifuko inayofadhili miradi ambayo haizalishi hewa ya ukaa hivyo, mradi huu ni mojawapo ya mradi ambao hauzalishi hewa ya ukaa, ni rafiki kwa mazingira,” ameongeza.
Kwa upande wake Mratibu wa Mradi wa Umeme Ijangala, Daudi Sanga amesema kwa kiasi kikubwa mradi huo umefadhiliwa na REA na wadau wengine wa maendeleo. Mradi huo unazalisha kilowati 360.
