đź“ŚZaidi ya shilingi bilioni 80 zimetumika miradi ya REA Njomb
đź“ŚWananchi watakiwa kutunza vyanzo vya maji
đź“ŚREA kuwezesha waendelezaji wadogo wa umeme kutoa huduma
Njombe
IMEELEZWA kuwa, Wakala wa Nishati Vijijini (REA) umepeleka umeme kwa wananchi wapatao 2,400 wa vijiji nane (8) vya Tarafa ya Lupembe, Wilaya ya Njombe mkoani Njombe baada ya kuiwezesha kampuni ya Matembwe Village Company Ltd kuzalisha umeme wa kilowati 550.
Hayo yamebainishwa leo Oktoba 30, 2024 na Mkurugenzi Teknolojia Mbadala na Nishati Jadidifu kutoka REA, Mhandisi Advera Mwijage alipotembelea mradi wa Matembwe Village Ltd unaomilikiwa na Halmashauri ya Wilaya ya Njombe pamoja na wananchi wa vijiji vya matembwe, Iyembela na Ikondo vilivyopo mkoani Njombe.
Amesema kuwa, mwendelezaji huyo ametoa huduma kwenye vijiji nane na jumla ya wateja 2,400 wameunganishwa ambapo kati ya hao, wateja wapatao 750 wameunganishwa kwa kuwezeshwa na Serikali kupitia REA.
“Gharama ambayo imetumika kuunganisha wateja ni takribani shilingi bilioni moja na REA inaendelea kumuwezesha kuunganisha wateja wengine ili wapate umeme wa uhakika, ” amesema Mhandisi Advera.
Ameongeza kuwa, kwa sasa REA imefikisha umeme kwenye vijiji vyote nchini ingawa bado wananchi wanahitaji huduma ya umeme kwenye baadhi ya vitongoji na kaya ambazo hazijafikiwa na huduma hiyo.
“Mradi kwa sasa una zaidi ya miaka 30 na bado unaendelea kutoa huduma kwa ubora kwa kuongeza wateja wanaounganishiwa umeme,” amesisitiza Mhandisi Advera.
Vile vile, REA inaendelea kuuwezesha mradi huo kwa kutoa fedha ili wananchi wanaozunguka mradi wapate huduma ya umeme na kukuza shughuli za kiuchumi.
Kwa upande mwingine, Mhandisi Advera amesema zaidi ya shilingi bilioni 80 zimetumika kwa ajili ya kutekeleza miradi mbalimbali ya REA katika mkoa huo ikiwemo kuhakikisha maeneo yote ya vijijini yanafikiwa na nishati ya umeme.
Naye, Mkurugenzi Mtendaji wa Matembwe Village Company ltd, Johannes Kamonga amesema kampuni hiyo inahusika na kuzalisha umeme, usafirishaji na kusambaza umeme.
Ameongeza kuwa, kwa sasa kupitia mradi huo wanazalisha kilowati 550 za umeme kwa mashine tatu huku mashine moja ikizalisha kilowati 80, nyingine kilowati 120 na nyingine kilowati 350.
