*Watuhumiwa watatu wakamatwa
Waziri Mavunde asisitiza kufuta leseni zao za kufanya biashara ya madini *
–Atoa rai kwa wadau kuzingatia sheria na taratibu
Dar es Salaam
WAZIRI wa Madini,Anthony Mavunde ametangaza kukamatwa kwa madini ya dhahabu kilo 15.78 bandarini yalipokuwa yakitoroshwa.
Ameyasema hayo leo Septemba,11 2024 Jijini Dar es Salaam alipokutana na alipozungumza na vyombo vya habari kuuhabarisha umma wa Watanzania juu ya tukio hilo.
“Nchi yetu inazo sekta kadhaa za uzalishaji ambazo mapato yake ndiyo msingi wa maendeleo ya uchumi wetu ikiwemo sekta ya madini. Sasa basi, tunapokuwa na watu wachache ambao wanajihusisha na shughuli hizi za utoroshaji wa madini na hivyo kuikosesha Serikali mapato hatuwezi kuwavumilia.
“Kilo hizo 15.78 kwa bei ya leo zina thamani ya takribani bilioni 3.4 fedha ambazo kwa sasa zote watoroshaji hawa wanakwenda kuzipoteza. Serikali tunakwenda kufuta leseni zao wakitiwa hatiani na mahakama na kuwaweka kwenye orodha ambayo hawataruhusiwa kumiliki Leseni ya kufanya biashara yeyote katika mnyororo wa thamani wa madini Nchini Tanzania”, amebainisha Mavunde.
Kwa kwa mujibu wa mahojiano ya awali wakati uchunguzi unaendelea, watuhumiwa wamesema madini hayo ya dhahabu walikuwa wanasafirisha kutoka bandari ya Dar es Salaam kuelekea Visiwani Zanzibar.
“Uchunguzi na Mahojiano na watuhumiwa yanaendelea,na pindi kazi hii ikikamilika tutawapandisha mahakamani kujibu mashtaka,”amesema Mavunde.
Akihitimisha taarifa yake, Mavunde amepongeza kazi inayofanywa na kikosi kazi cha kuzuia utoroshaji wa madini kwa kushirikiana na vyombo vingine vya usalama na kutoa rai kwa wafanyabiashara nchini kuacha tabia ya utoroshaji kwani inarudisha nyuma juhudi za Serikali kukuza uchumi wa Nchi yetu.
