Na Mwandishi wetu, Congo
WAZIRI wa Ulinzi na Jeshi la Kujenga Taifa, Dk. Stergomena Tax ametoa salamu za pole kwa Mkuu wa Majeshi ya Ulinzi Tanzania, Jenerali Jacob John Mkunda, kufuatia vifo vya Wanajeshi watatu na wengine watatu kujeruhiwa , kutokana na shambulio la bomu wakati wakishiriki Misheni ya Jumuiya ya Maendeleo ya Kusini mwa Afrika (SADC) nchini DRC Congo.
Katika taarifa yake Waziri Tax, amesema Tanzania imepoteza mashujaa hao wakiwa katika majukumu ya kutafuta amani ya Jamhuri ya Kidemokrasia ya Kongo.
“Tunawaombea mashujaa wetu Mungu awalaze pema peponi, na kuwaponya haraka majeruhi mashujaa wetu wata pumzishwa kwa heshima zote kwa kuzingatia taratibu za kijeshi,” amesema
Pia amelipongeza Jeshi la Wananchi wa Tanzania kwa kazi kubwa wanayoifanya ya kulinda amani, katika mipaka yetu na nje ya mipaka yetu kulingana na makubaliano na Itifaki za Kikanda na Kimataifa ambapo Tanzania ni mwanachama.
Aidha ametoa pole kwa ndugu, jamaa na familia kwa kuondokewa na wapendwa wao ambao wamepoteza maisha katika kutafuta amani nchini DRC.
